الإندومي بطرق مختلفة
تعرف الإندومي، مكرونة سريعة التحضير وأكلة ليها شعبية كبيرة قوي ومحبوبة جدا، الأطفال والمراهقين بيموتوا فيها، وجبة آخر الشهر في الشغل لما الفلوس بتخلص وأي حد مستعجل وعايز أكلة سخنة، مشبعة، سريعة، وأهم حاجة إنها رخيصة.
مؤخرا ظهر الكثير من الحديث عن أضرارها وإن استهلاكها بشكل يومي وبكميات كبيرة ليه أضرار صحية وإن فيها نسبة عالية من الصوديوم وأكياس التوابل الموجودة معاها فيها منكهات صناعية ضارة بس بالرغم من كده،
الأطفال بتحبها وبتطلبها ودايما يشبطوا فيها والكبار ساعات كتير مبيقدروش يمنعوها وبيلجأوا لها وقت الطوارئ. عمليًا مش هنقدر نمنع استهلاكنا للنودلز سريعة التحضير بشكل نهائي لكن نقدر ناكلها بحساب عند اللزوم من باب التغيير وممكن نزود عليها إضافات تعلي القيمة الغذائية ليها.
المعهد القومي يصدر بيان بخصوص الإندومي
وأصدر المعهد القومي للتغذية، بيانًا، ذكر فيه أن الإندومي من الأطعمة الجاهزة عالية المحتوى من النشويات، والتي يؤدي تناول الأطفال والشباب لها إلى زيادة الوزن والسمنة وما يترتب عليها من أمراض مزمنة مثل السكر والضغط والقلب، كما أن تناول الأطفال للإندومي كوجبة يقلل من تناولهم للأغذية المفيدة التي يحتاجونها مثل الخضار، والفاكهة ومنتجات الألبان.
النهاردة راديو نجومنا هيقولكم على مجموعة طرق وإضافات تنكّهي بيها الإندومي سريعه التحضير وتخليها وجبة كاملة ولذيذة، عشان لما يكون نفسك فيها إنتي أو أولادك تقدري تقدميها لهم بشكل صحي ولذيذ. الأفكار إلي هنشاركها معاكي كلها بتعتمد على عدم استخدام أكياس البهارات الإضافية الموجودة مع النودلز.
1-شوربة الخضار مع الفراخ
تقدري تحضري شوربة خضار فيها مجموعة متنوعة من الخضراوات المشكّلة إلي بتحبيها مع مرقة فراخ متحضرة في البيت ومتنكهة بكل المطيبات إلي متعودين عليها، ولمزيد من النكهة ضيفي شويه من عصير الطماطم للمرقه والنودلز وسيبيها تستوي مع كل الخضراوات دي هتكون طبق شوربة هايل للشتا، قدميها مع شرايح الفراخ.
2-برطمان سلاطة التونة والخضار
فكرة السلاطة في البرطمانات فكرة محبوبة وعملية جدا عشان تاخديها معاكي الشغل.كل إلي هتعمليه إنك هتسلقي النودلز في ميه مغلية أو تضيفي عليها ميه مغلية وتغطيها شويه لحد ما تستوي؛
وتبرديها وتجمعه البرطمان بتاعك، هتعملي طبقات من الخضراوات إلي بتفضليها مع طبقة من التونه والدريسينج إلي تحبيه وقت الأكل هترجي البرطمان وتفضيه في الطبق وتاكليه.
3- الإندومي الحارة مع البيض المسلوق
ناس كتير بتحب النودلز عشان مشطشطة وبما إن إحنا هنستغتى عن التوابل والبهارات الموجودة معاها يبقى لازم يكون في بديل ؛ هنستخدم صوص السيراتشا الحراق وده نوع من الصوصات الآسيوية الحراقة جدا مع معلقة من الجنزبيل الفريش المفروم والتوم المفروم ؛
هنشوحهم على النار في معلقة صغيرة من الزيت ونضيف صوص السيراتشا ونضيف المرقة البيتي سواء مرقة خضار أو فراخ وبكده نكون نكهنا مرقة تسوية النودلز، هنضيف بعد كده النودلز لحد متستوي ونزينها بالفلفل الحار والكزبرة الخضرا والبصل الأخضر مع بيضة مسلوقة لإضافة عنصر البروتين. احترسوا من الوصفة دي لإنها مش لأصحاب القلوب الضعيفة وحراقة جدًا ومش للأطفال.
4- مقرمشات النودلز بالشكولاتة
ودي الحقيقة فكرة هايلة تتعمل في مناسبات وأعياد ميلاد الأطفال والسبوع كمان.
سهلة وبسيطة وشكلها مميز كل إلي هتعمليه إنك هتكسري النودلز وهي مقرمشه بدون تسويه وتجمعي كل شويه مع بعض زي العش على صينيه عليها ورقة زبدة ومدهونة بزيت خفيف عشان يساعدك وإنتي بتفكيها من الصينية وتبدأي تنزلي عليها شوكولاته سايحة لحد متتغطى كويس. زيني كل عش بأي كانديز بيحبوها أولادك.
5- نودلز كريمية مع الكاري والخضار
عشان تعمليها هتحتاجي معجون الكاري الجاهز هتلاقيه متوفر في أي سوبر ماركت كبير ولبن جوز الهند عشان هو ده إلي هيخليها كريمية جدا.
هتضيفي معلقة من معجون الكاري على كمية متساوية من لبن جوز الهند والمرقة البيتي وتخليهم يسخنوا على نار هادية و ضيفي بعد كده النودلز تستوي في المزيج ده وتاخد كل نكهتها منه وتبقى كريمية ولذيذة. قدميها مع الكرنب الصيني والمشروم وعصير الليمون واستمتعي بنودلز بلمسة تايلاندية.
6- نودلز الحلو والحامض
الفراخ السويت آند ساور كلنا بنحبها وبنطلبها من المطاعم الصينية، طب ليه منجربهاش مع النودلز سريعه التحضير.كل إلي هتحتاجيه صوص الحلو والحامض الجاهز وهيكون متوفر في أي سوبر ماركت كبير في منطقة الصوصات الصينية، وشوية من الفلفل الألوان والأناناس المعلب أو الطازة زي ماتحبي.
هتشوحي في معلقة زيت معلقة من التوم والجنزبيل المفرومين وتشوحي الفلفل الألوان والأناناس وتضيفلهم كمية مناسبة من صوص الحلو والحامض وتضيفي النودلز المسلوقة وتقلبي كل المكونات وتكون جاهزة للتقديم وتقدري تضيفي معاها مكعبات من الفراخ لو حبيتي.
