فن
حوار خاص لــ نجومنا مع النجم الصغير ادم وهدان نجم مسلسل “لعبة النسيان”
حوار : رشا انور
فى حوار خاص لــ نجومنا عبّر الطفل آدم وهدان، عن سعادته بمشاركته في مسلسل “لعبة النسيان” الذي يعرض في الموسم الرمضاني الحالي 2020،
حيث يجسد شخصية “يحيى” إبن دينا الشربيني، “رقية”واستطاع الفنان الصغير ادم وهدان ان يخطف قلوب المشاهدين من خلال طلته المبهجة وادائه الرائع وصدق تمثيله واحساسه وكان لــ نجومنا حوار خاص معه ومع والدته
*في البداية .. كيف تم ترشيح ادم لمسلسل “لعبة النسيان” ؟
صرحت د/ امنية سرحان والدة النجم الصغير ” ادم وهدان ” قمنا بالذهاب إلى الأوديشن الخاص بالمسلسل، وتم إختياره من قبل الأستاذ هاني خليفة لتجسيد شخصية “يحيى” إبن دينا الشربيني التي تجسد شخصية “رقية” بين الكثير من الاطفال المرشحين للمسلسل وتم اختياره من مشهد مقابلة يحيي لمامته فى المسلسل تحديدا من مشهد
” انا كنت باخدك معايا فى كل حتة ”
* كيف كانت كواليس المسلسل والعمل مع دينا الشربيني؟
قالت والدة ادم وهدان ان ادم بيحب دينا الشربيني جدا و كانوا دايما بيضحكوا سوا فى كواليس التصوير وبيتصوروا مع بعض كتير واول ما بيشوفها بيجري عليها ويحضنها من حبه الشديد ليها بالاضافة لتصريحها بان دينا الشربيني حلوة من جوا ومن برا كمان ودايما كانت بتراجع معاه المشاهد .
* من أكثر فنان قام بدعم ادم اثناء تصوير لعبة النسيان ؟
وقالت والدة ادم وهدان كل الفنانين كانوا بيشجعوا ادم وبيدربوه ابتداء من دينا الشربيني اللى كانت دايما بتراجع معاه المشاهد دايما فى الكواليس وادم بيقول عليها ” مامى ” والفنان الكبير محمود قابيل اللى ادم بيعتبره زى جدو وبيحبهم جدا والاستاذة الكبيرة رجاء الجداوى كانت من اكتر الناس المشجعة ليه
وصرحت انها فخورة بشغلها مع ادم مع العلم ان احنا اللى فخورين ولينا كل الشرف بان ادم اشتغل مع فنانة كبيرة زى رجاء الجداوى واضافت ان يعتبر كل الفنانين فى المسلسل كانوا مشجعين له .
* من قام بتدريب ادم على شخصية ” يحيي ” ؟
أستاذة ريم حجاب قامت بتدريبه، وكانت بتراجع معاه المشاهد الخاصة بيه ، وكان دوري انى كنت بساعده على حفظ المشاهد
*كيف كانت الجواء بالكواليس الخاصة بالمسلسل ؟
اعربت والدة ادم عن سعادتها بالاجواء العامة للكواليس كانت مصدر تشجيعي لظهور اداء ادم بالمنظر الجميل دة واظهار كل مواهبه اللى فجأتنى انا شخصيا وفخورة بتطويره فى تمثيله رغم صغر سنه واستاذ هانى خليفة واحمد شفيق كانوا قادرين على اظهار احساسه ومواهبه فى التمثيل .
*كيف كان اللوكيشن فى ظل انتشار فيروس كورونا ؟
لوكيشن التصوير كان معقم لدرجة كبيرة ، وكان فيه دكتور متواجد طوال الوقت للأطمئنان على سلامة الجميع ، بالاضافة انى بصفتى دكتورة كنت بعقم ادم دايما بالكحول حفاظا عليه وعلى سلامته .
* ما هي أبرز التعليقات التي تلقاها ادم على الدور ؟
مبدائيا متخيلتش ردود الافعال الايجابية على السوشيال ميديا عن دور ادم فى المسلسل وفرحت جدا بنجاحه وكانت افضل التعليقات اللى حبيتها جدا تسميته بالحصان الاسود وانه افضل ممثل لهذا العام فى رمضان بالاضافة بأنه طفل يخطف القلب واستكملت ضاحكة :
” فيه كراشات رهيبة وفيه بنات عايزة تتجوزه من دلوقتى “
* مين احب الفنانين لادم ويتمنى يشوفهم او يمثل معاهم ؟
علقت والدة ادم عن هذا السؤال قائلة :
بيحب الفنان تامر حسني جدا فوق ما تتخيلي وبيتمنى يمثل معاه ويقابله ودايما يغنى اغنيته عيش حياتك وعامل فيديو ليها على التيك توك بالاضافة لحبه الكبير للفنان عادل امام دايما بيتفرج على افلامه القديمة ويضحك و يتفاعل معاه من خلال افلامه ويرددها من كتر حبه ليه والفنان الكوميدى احمد حلمى بيحبه جدا بالاضافة لممثلين كتير بس دول اكتر الفنانين اللى بيحبهم “
*استكملا لحوار “نجومنا” سألنا والدة النجم الصغير ادم وهدان عن هل فى تحضيرات الفترة القادمة عن اعمال جديدة ؟
صرحت امنية سرحان والدة ادم قائلة ” نعم فيه عروض كثيرة خلال الفترة الحالية ولكن مفيش اى حاجة اكيد او اختيار شي معين .
* لاحظنا ان شكل ادم كان بشعر طويل الفترة السابقة هل تم تغير استايل الشعر لشخصية المسلسل ؟
وكان رد والدة ادم وهدان ” بالفعل ادم شعره طويل دايما ومبيحبش يقص شعره وانا بحب شكله جدا بشعره وهو طويل لكن قبل دخوله مسلسل ” لعبة النسيان ” كان بيمثل فى مسلسل “ما وراء الطبيعة” وكان احداثه تدور حول سنة 1950 ومكنش فيه اطفال شعرهم طويل فى الفترة دى فــ كان لازم يقص شعره عشان دوره فى المسلسل واستكملت حديثها
“بأن وشه ظهر لما شعره اتقص وده كان سبب كبير فى ظهور ريأكشنات ادم فى المسلسل لان دايما شعره كان مخبي وشه وتعابيره “
فى نهاية الحوار اعربت والدة ادم وهدان عن سعادتها بالحديث مع نجومنا وعن نجاحها لادم فى مسلسل لعبة النسيان قائلة المسلسل هيبقي نقطة فاصلة فى مستقبل ادم الفنى
ووجهت رسالة لكل الداعمين لادم قائلة :-
” يارب دايما ادم يبقي عند حسن ظن الناس ويكون دايما محبوب بتمثيله وادواره وبشكر كل الناس على كلامهم ومباركتهم على نجاحه لاني حسيتهم فعلا واقفين فى ضهره فــ يارب يديمها نعمة عليه ومش عارفة اشكرهم ازاى بس انشالله مش هيخذلهم “
