فن
محمد رشاد فى حوار خاص لــ نجومنا ” شخصية أمير شبهى ” واعتذارنا عن برنامج المتزوجون
حوار / رشا انور
فى حوار خاص لـ نجومنا عبر الفنان محمد رشاد عن سعادته بدخوله تجربة التمثيل لأول مرة فى السباق الرمضانى لهذا العام من خلال مسلسل “ليالينا ٨٠”،
تأليف أحمد عبد الفتاح وإخراج أحمد صالح .
حيث يجسد محمد رشاد، شخصية المطرب أمير المالكي، خلال الأحداث ويعمل بإحدى الكباريهات ورغم انها تجربته الاولى فى التمثيل ؛
الا ان صدى الدور كبير وردود الافعال بالسوشيال ميديا يدل على نجاحه فى التمثيل وكان لــ نجومنا حوار خاص معه رغم انشغاله فى باقي تصوير حلقات المسلسل
*فى البداية كيف تم ترشيحك لشخصية امير فى مسلسل ليالينا 80 ؟
وبدأ رشاد اجابته قائلا :
” الدور اتعرض عليا كنت مسافر فى دبي قبل انتشار فيروس كورونا واتواصل معايا مدير اعمالى وبلغنى بأني مترشح فى دور فى مسلسل هيتم اذاعته في رمضان
فسألته عن ابطال المسلسل فبلغنى بانهم غادة عادل وإياد نصار وصابرين وخالد الصاوى ؛
فقولتله مفيش مشاكل اعرف تفاصيل الدور وبلغنى ؛ بعدها اتفقنا وتم التعاقد ورجعت من دبي على التصوير
لان بالفعل فريق العمل كان بدء تصوير فى المسلسل .
*التمثيل خطوة صعبة ازاى قدرت تواجه الخوف وتمثل شخصية ” امير المالكى ” فى ليالينا 80 ؟
بالفعل كان صعب مبدائيا لانى اول مرة امثل بالاضافة لانى عمري مااخدت اى ورش تمثيل ولكن الدور كان مطمنى لانه مطرب وشبهي فى الشخصية او فى التعامل نوعا ما .
*بما ان شخصية امير تشبهك كمطرب قدرت ازاى تتدمج بين التمثيل والغناء ؟
شخصية امير زى ما ذكرت انه يشبهنى كمطرب بيدور على حلمه وبيحاول يبقي مطرب مشهور فيعتبر دة كان نفس طموحى اللى كنت بدور عليه
فالشخصية فى سماتها الاولية فيها شبه كبير منى فعرفت اظهر الدور بشكل لائق
وبما انى مطرب فكان سهل عليا اتعامل مع الفرق الغنائية والتعامل مع الجمهور بالاضافة ان دور امير المالكى شحصية بسيطة
ولكن الطرق اللى بيحقق بيها حلمه فى المسلسل هنا كان الاختلاف بين شخصيتى وشخصية امير ؛ وكان من الضروري التركيز على هذه المشاهد .
*محمد رشاد هيكرر تجربة التمثيل من جديد بعد ليالينا 80 ؟
صرح رشاد قائلا ” ان ليالينا 80 بالنسبالي الخطوة الاولى فى مشواري الفني فى مجال التمثيل ؛
واعرب رشاد عن حبه الكبير للتجربة وعن مدى اعجابه بكل التفاصيل الخاصة باللوكيشن
واستكمل رشاد ” ان اللى جاى افضل بكثير من ادائي فى ليالينا 80 لانها تجربتي الاول بدون اى ورش تمثيل
وكان التمثيل اجتهاد شخصي بدون توجيه من اى شخص لضيق الوقت .
وصرح ايضا “بعد انتهائي من تصوير ليالينا 80 هبدء فى انضمامى لاكتر من ورشة تخص التمثيل وهتتكرر تجربة التمثيل الفترة الجاية كتير “
ونجومنا مسالش رشاد على تجربته الاولى فى التمثيل واكتفي لكن سالنا رشاد عن اعماله الفنية كمطرب خلال الفترة الحالية والجاية ايضا فأستكمالنا الحوار بالاسئلة الاتية .
*الفترة الاخيرة اتجه محمد رشاد لاغانى السنجل بشكل كبير هل فكرة الالبوم مؤجلة بالنسبالك ؟
صرح رشاد بأن موضوع الالبوم كان بيتم تحضيره وللاسف حصل اكتر من مشكلة فى الانتاج ودة السبب الرئيسي لتعطيل إصدار البوم غنائي كامل
و الفترة الحالية بيتم التحضير لالبوم مع شركة انتاج جديدة ولكن الذوق العام متجه اكتر للسينجل اكتر .
*تم الاعلان قبل شهر رمضان عن برنامج المتزوجون من تقديمك مع مى حلمى هل تم تحديد موعد عرضه ؟
مبدائيا البرنامج مكنش في اي جدية من الشركة المنتجة وبعدها انشغلت بتصوير مسلسل ليالينا 80 فإعتذرت انا ومي عن البرنامج ؛
لانه للاسف مكنش هيظهر بالشكل اللى يليق بظهورنا مع بعض وبالشكل اللى كنا حابين يوصل للجمهور .
*بمناسبة ترحبيك بتكرار فكرة التمثيل ممكن تخوض فكرة السينما ؟
بالفعل حابب اكرر فكرة التمثيل و بالنسبة للسينما ان شاء الله قريبا لو تم الاتفاق هيكون فى فيلم قصته حلوة جدا ؛
بس مازال لسة الورق متكتبش ولسه الاتفاق جاري مع باقي النجوم واول مايتم الاتفاق اكيد هبلغكم واعلن .
*من وجهه نظرك شايف ان فيروس كورونا كان له اثر سلبي على المطربين ؟
أكيد له تأثير سلبي كبير مش بس علي المطربين للاسف علي كل العاملين بمجال الحفلات و الأفراح ومتعهدين الفنانين ؛
و منظمي الحفلات و الافراح و أصحاب القاعات و مهندسين الصوت و مش بس الفنانين كل الناس اتأثروا بفيروس كورونا .
*بمناسبة الحظر معظم المطربين بدءوا يعملوا حفلات لايف هل فكرت تعمل نفس الفكرة ؟
للاسف محبتش خالص الفكرة وغير مقتنع بالحفلة من غير جمهور حتى لو علي الميديا او اليوتيوب مش بلاقيها ليها تفاعل ؛
بالاضافة انى مش هقدر اسيب مود الغناء واشوف الناس مبسوطين او لا وحابين يسمعوا ايه عن طريق الكومنتات
فكنت مش مشجع الفكرة عشان التفاعل مش موجود على عكس الحفلة والاستيدج ووجود الجمهور وتفاعله معايا .
اخيرا وليس اخر وجه نصيحة لكل محبي محمد رشاد بمناسبة انتشار فيروس كورونا ؟
واختتم رشاد حواره مع نجومنا بتوجيه نصائح لجمهوره قائلا :
” خلي بالكم من نفسكم وحاولوا تلتزموا بالبيت دايما ؛
وياريت بلاش الاختلاط كتير عشان ربنا يعدى الازمة اللى احنا فيها علي خير وربنا يحمينا ويسترها علينا جميعا
واكد رشاد ان اولا واخيرا بترجع للنظافة الشخصية وبالاهتمام الشخصي ويارب محدش يفقد حد عزيز عليه ولا غالي عليه “
