في إطار ذلك كان لـــ ” راديو نجومنا ” لقاء حصري مع النجم المتألق أحمد مصطفى و إليكم نص الحوار : –

– فى البداية حابين نعرف اكتر عن بدايتك فى المجال الفنى ؟ 

مبدأيا أنا خريج كلية أداب قسم مسرح جامعة الاسكندرية ؛ تم تعيني فى البيت الفنى للمسرح لأنى كنت أول دفعتى على دفعة المسرح الكوميدى أول ما أتخرجت علطول ؛

أشتغلت مسرح دولة ومسرح نوادى فى إسكندرية بالاضافة للثقافة و اشتغلت مستقلين فى فرقة جماعة المسرح البديل و  فرقة المدينة  واشتركت فى عروض مهمة جدا مع الفرقتين فى إسكندرية ؛

وأشتغلت على سبيل الأحتراف فى عروض فى المسرح الكوميدى بطولة نجوم كبار مثل الأستاذ محمد نجم رحمة الله عليه وأبتديت أسعى فى المكاتب الخاصة يشغل السينما وكان أول مشهد عملته كان فى فيلم معلش أحنا بنتبهدل بطولة الأستاذ أحمد آدم وكان فى دور (مهندس دش) وكان أول مرة فى حياتى أقف امام الكاميرا .

– كيفية ترشيحك للدور فى مسلسل الإختيار ؟؟

أترشحت لدور ياسر عن طريق الأستاذ ابراهيم فرج مساعد دكتور بيتر والكاستنج دايركتور الخاص بالمسلسل و دكتور بيتر كان عارفنى وأشتغلت معاه قبل كده فى فيلم  (برد الشتاء) كان دوري سواق ميكروباص والحمد لله أترشحت للدور .

– كيفية إستعدادك لدور بالأهمية دى ؟

أستعدادى للدور كان مذاكرتى للدور ده كويس جدا لأن هو دور عنده حاجات خاصة جدا وعنده صفات خاصة جدا جدا يعنى زى الأنطوائية وحزين على صاحبه وملهوش أصحاب ومش عايز يصاحب حد ؛

عشان محدش يتعلق بيه ولا هو يتعلق بحد ولا يتضايق تانى ولا يزعل تانى بعد زعله الكبير على صاحبه اللى استشهد جنبه وهو معرفش يعمله حاجة ودى كانت نقطة مهمة جدا فى الشخصية ؛

وبعد كده الشخصية بتتدرج شوية ويبتدى يحب أوى المنسى ( القائد بتاعه) ويقرب منه جدا لأن بيلاقيه مهتم بيه وعايز يصاحبه فعلا وبان أوى فى المشهد اللى بيودعه فيه ده قد إيه هو اتعلق بيه وحبه جدا وأثر جدا جدا فى حياته

– هل لك علاقة بأهل الشهيد محمد أيمن شويقه ؟؟

أنا الحمد لله على اتصال بأسرة الشهيد محمد أيمن شويقه رحمة الله عليه وأخوه ممتاز بيكلمنى وانا بكلمه وهما ناس فى منتهى الجمال والطيبة وفرحانين جدا بالدور وفرحانين جدا بالمسلسل وبتجسيد شخصية إبنهم البطل فى عمل زى ده ودى حاجة هايلة جدا بالنسبة لى .

– ما سبب تسمية الشخصية بأسم ياسر ؟؟

هى الشخصية أتسميت ياسر لأن الشخصية برضه فيها رمزية لكذا شخصية مجند فى الجيش قام بالفعل البطولى ده على كلام الأستاذ / باهر دويدار .

– هل تجربتك فى مسلسل الاختيار التى جاءت بعد مشاركتك فى فيلم الممر دليل على حبك فى المشاركة بالأعمال الوطنية ؟؟

دور العسكرى المصرى ده دور حلو جدا جدا على فكرة وغنى كده بمشاعره وتفاصيلة واحاسيسه وكان فى الممر برضو شخصية العسكرى جورج وهى موضحتش أوى فى الفيلم لأن فيه حاجات كتير أتشالت من شغلى ؛

بس الشخصية كانت حلوه برضو هو كان شاعر وعايز يبقى ليه نشاط ثقافى وفى نفس الوقت هو مجند فى الجيش ومثقف شوية وشخصية ياسر كذلك لأن عسكرى الجيش ده من الشخصيات الحلوه جدا جدا اللى بتبقى غالبا فيها مشاعر وفيها بطولة واصرار وقوة ؛ فعلا شخصية غنية أوى والواحد يحب يعمل الدور ده .

– عرفنا ان فيه جزء تانى من المسلسل هل ده كان متخطط ليه من الأول ولا ده كان قرار بعد نجاح المسلسل ؟وهل تتمنى المشاركة فى المزيد من الأعمال الوطنية؟؟

من وجهه نظري بالفعل نجاح الجزء الأول هو مبرر لعمل جزء تانى ولكن معنديش معلومة يقينية اكيدة ؛ أما بالنسبالى أه طبعا أحب اشارك فى الاعمال الوطنية بتبقى فيها متعة كبيرة وفيها مسئولية كبيرة ؛

وان الناس تعرف الخبايا والخفايا الخاصة ببطولات الجيش المصرى على مر التاريخ ؛ لان طول الوقت فيه بطولات للظباط ولأفراد الجيش كويس جدا الناس تعرفها .

– مين اكتر الممثلين فى مسلسل الإختيار كان قريب منك أثناء التصوير؟؟

كل الناس اللى صورنا سوا  كانت قريبه منى أستاذ أمير كرارة  أنسان جميل جدا ومتعاون مع زمايله وبيحب يعمل حاجة حلوة وبيحب يعمل مشهد صادق ومهتم بتفاصيل كتير جدا فى الموضوع ؛

وهكذا أستاذ أحمد وفيق و محمد هانى و أحمد سند و إبراهيم طلبة و مروان عبد العظيم و إبراهيم الترامسى  كل مجموعة العمل هايلة بصراحة .

– لو هنتكلم عن أدوارك الجميله فى كل اعمالك اللى فاتت إيه أهم دور شايف أنك شاركت فيه ؟؟ وإيه أكتر دور كان قريب لقلبك؟!

من أكتر الأدوار اللى بحبها يعنى مثلا بحب أور دور مؤمن فى مسلسل أنا شهير أنا الخاين؛ الشاب الجامعى اللى كان عنده محل بويات وكان بيتقدم لـ عزة اللى هى الفنانة ياسمين أبو اليزيد؛

وبعد ما مشى فى الموضوع وخطبها وحبها وعمل فرح فهى بتسيبه فبيعملوا مشهد حلو أوى ؛ وبحب دور (بوتره) السنة اللى فاتت فى مسلسل زلزال مع الاستاذ محمد رمضان وكانت شخصية دمها خفيف كده وعلمت مع الناس وكانت كوميدية لطيفة .

– مين من الممثلين لسه مجتش الفرصة تمثل معاه ومستنى يجمعكم عمل مع بعض؟؟

نفسى أشتغل أوى مع عمرو عبد الجليل ومع خالد الصاوى و فتحى عبد الوهاب و ماجد الكدوانى تعتبر دى أهم الأسامى اللى أنا فعلا نفسى يجمعنى معاهم اعمال الفترة القادمة .

– حابين نعرف هل فى تعاقدات على  أعمال جديدة خلال الفترة الجاية  ؟

والله هو حاليا لسه مش عارف ايه الأعمال القادمة وربنا يبعت ولما يتضح معالم السيزون الجديد أو الأوف سيزون اللى جاى وربنا يكرم بإذن الله

– من هو قدوتك فى المجال الفنى  ؟

الاستاذ الكبير عادل إمام لإنى بشوفه نموذج كبير فى المجال الفنى قدوه فى التمثيل وللنجاح وللقوة ولصدق الموهبة ولتأثير الموهبة وهو فنان تاريخه مرعب وهو نموذج وقدوة كبيرة جدا جدا بالنسبة ليا .

– ما هى هواياتك الشخصية؟

أكتر هواية بحبها انى اتفرج على المسرحيات والأفلام ودى أكتر هواية بالنسبالى بحبها فى أغلب الأوقات .

– أين ترى نفسك بعد 5 او 10 سنوات؟؟

اكيد دة كلام فى علم الغيب ولكن ما اتمناه انى اكون بعمل أدوار كويسة وربنا يكرمنى بدور أيا كان مساحته وحجمه بس انى اعمل دور كويس ويعمل رد فعل كويس مع الناس وقتها هكون فرحان جدا .

– نصيحة تحب توجهها لكل موهوب شايفك قدوة ليه وحابب يكون ناجح زيك فى المجال؟؟

أهم نصيحة أوجهها لاي موهوب هى إنه يمثل فى أى مكان ويشتغل مسرح كتير جدا ويسعى كتير جدا فى أى مكان يعرف أن فيه كاستنج والمجال ده عايز صبر ويكون صبر جميل لكن مبقاش متضايق وعايز اشتغل واخد فلوس ؛

لكن بالعكس خلال الصير ده أكون بذاكر وبتعلم وبتفرج وبشتغل وبعمل عرض وبعمل فيلم قصير وبتدرب عشان لما يجيله الفرصة يكون جاهز وواقف على رجله