كتبت / رشا أنور
خطيبة تامر عاشور السابقة
دارين حلمي خطيبة تامر عاشور السابقة تخرج عن صمتها
صرحت منذ قليل ملكة جمال الكون السابقة، دارين حلمي خطيبة تامر عاشور السابقة، عبر حسابها الرسمي بموقع تبادل الصور والفيديوهات “إنستجرام”، تفاصيل فسخ خطوبتها من الفنان تامر عاشور.
ونشرت دارين حلمي بيانًا توضيحا، استشهدت خلاله بقوله تعالي: “يا أيها الذين آمنوا إن جاءكم فاسقٍ بنبأٍ فتبينوا أن تصيبوا قومًا بجهالة فتصبحوا على ما فعلتم نادمين”.
خطيبة تامر عاشور تروي قصة انفصالهم
وبمتابعة راديو نجومنا استكملت دارين: “نظرًا لاتهامات وإشاعات اتوجهت لي الفترة اللي فاتت وبدون وجه حق، كان لازم أخرج عن صمتي وأوضح موقفي لإن مش دارين اللي تاخد راجل متجوز أو تكون سبب في خراب بيت حد، وبالتالي مليش ذنب في أي حاجة،
تامر دخل البيت من بابه واتقدم لأهلي رسمي على أساس أنه مُطلق وده اللي أنا كنت فاهماه زيي زي جمهوره، عادي إن بنت ترتبط براجل مُطلق مش أزمة، وحصلت الخطوبة بشكل رسمي زي ما عرفتوا ومشيت الأمور في مجراها الطبيعي لحد ما بالصدفة اكتشفت أن لسه زوجته على ذمته وفيه قضايا بينهما، ولم يتم الانفصال بشكل رسمي”.
وتابعت: “أي بنت في الموقف ده طبعًا لازم تنسحب مهما كان الحب، ومهما كانت العواطف لأن مش دارين حلمي اللي تاخد راجل من زوجته مهما كان هو مين، كده كده أنا كنت مستمرة في مسابقات ملكات الجمال وليا الكارير الخاص بيا، فكل مرة بقرر الانسحاب كان تامر بيرفض، وإن كده كده الطلاق قائم سواء أنا في حياته أو لأ وده مش يخصني في شيء”.
وختمت “حلمي” منشورها: “في الآخر أنا صممت على فسخ الخطوبة بمنتهى الاحترام ما بيني وبينه لأنه مينفعش وكل التوفيق والنصيب بإيد الله، ربنا يوفقه في حياته ويوفقني في خطواتي الجاية إن شاء الله،
تامر إنسان محترم مشفتش منه غير كل خير واحترام وحب، وأنا بحترمه على المستوى الفني والشخصي لكن ده نصيب وربنا يوفقه في حياته، وأتمنى محدش يتكلم في حاجة ميعرفش تفاصيلها، وشكرًا لكل الناس اللي بتحبني وعرفاني كويس، أظن أنا جاوبت على كل حاجة ومش هفتح الموضوع ده تاني نهائي أرجو احترام موقفي”.
يذكر أن “عاشور ودارين” ارتبطا في بداية العام الماضي بعد قصة حب كبيرة، لكن دبت الخلافات بينهما وانتهت العلاقة، ثم عادا من جديد في نوفمبر من العام الماضي، قبل أن ينفصلا مرة أخرى.
من هي دارين حلمي خطيبة تامر عاشور
تعرف ان فازت دارين حلمي بلقب ملكة جمال الكون للسياحة والثقافة الدولية لمصر لعام 2019 ؛ مثلت مصر في المسابقة الدولية لملكة جمال الكون للسياحة والثقافة الدولية،
ولكنها لم تفز بها، فيما اقتنصت الأسترالية جوليانا نيكول اللقب، وعلقت دارين على مشاركتها بالفعالية، عبر حسابها على إنستجرام، قائلة: “حققت أول حلم من أحلامي، وربنا دايما مبيضيعش تعب حد وطبعا ده كله بفضل ربنا ودكتورة أمال”.
وتابعت: “أنا مبسوطة إني عرفت أحافظ على تقاليد بلدي، وموقفتش ببكيني عشان أخد لقب، وموافقتش البس قصير، والحمدلله أخدت لقب من مدونة ميسوسولجي كأفضل متسابقة خلال النسخة الحالية لمسابقة ملكة جمال الكون للسياحة والثقافة الدولية”.
– أعلنت في سبتمبر الماضي عن خطبتها من المطرب تامر عاشور قائلة: “عايزة أقولك إنك أجمل حاجة حصلتلي، أنت أجمل حلم حلمته وحققته، معنديش أحلام بعدك تاني ربنا عوضني بيك وبكل حاجة حلوة، ومبسوطة أنك غيرتني بحبك يا تامر يا أجمل صدفة في حياتي كلها”، إلا أن الخطبة لم تستمر سوى أسابيع معدودة.
دارين حلمي خطيبة تامر عاشور السابقة تعرف انها تحب السفر والترحال والمشاركة في الأعمال الخيرية والتطوعية ؛ بدأت حسابها الرسمي على موقع إنستجرام في سبتمبر 2018، ويتجاوز عدد متابعيها حاليا الربع مليون.
سمر زوجة تامر عاشور ترد
وعلى الصعيد الاخر حرصت سمر أبو شقة زوجة الفنان تامر عاشور توضيح بعض النقاط المتعلقة بعلاقتهما، عقب الجدل الذي أُثير مؤخرًا فور إعلان رغبتها في الانفصال عنه.
وعبر حسابها بـ”إنستجرام”، نشرت “سمر”، صورة تعبيرية لشخصين تتوسطهما طفلة، وعلقت عليها: “أنا وتامر هنفضل نحترم بعض لأن في بينا عشرة وفي بينا بنتنا أيام اللي هتفضل رابط بينا طول العمر.. واللي أهم ليا أنها أن شاء الله تكبر متلاقيش أي حاجة تضايقها وتلاقي كل هدوء.. الموضوع لا ترند ولا شو ولا أي حاجة غير حقيقة وحاجة بتحصل كل يوم بس بيحصل اللي حاصل لما يبقى حد مشهور”.
وأضافت: “إحنا آه منفصلين (مش مطلقين) (ولا اطلقنا).. .ومرينا بمشاكل زي أي ناس طبيعية ..اتفقنا أو اختلفنا بتحصل يعني وبغض النظر عن مين غلط في حق مين وإزاي.. ولكن مهما حصل مفيش حد هيقبل أن يحصل تجريح للتاني في اللي جاي”.
وتابعت: “أنا رديت على أسئلة الاستورى بعفوية وبطريقتي اللي عمرها ما هتتغير وعادي جدا بس للأسف في مواقع حطت عناوين غلط علشان تشد وتزود التفاعل عندها وخلاص..
وعلي فكرة كلامي كان واضح وبسيط وموجود لحد دلوقتي مشلتوش على بروفايلي هنا، ومقولتش أي حاجة غير الحقيقة اللي حصلت ببساطة وكان ظاهر منها ٨٠ % أو أكثر من غير أي شرح، ومنعا للمهاترات هي مش حرب مع أبو بنتي ولا عمرها هتكون”.
واستطردت: “والمفروض إننا نتفق بكل هدوء على الطلاق إنه يتم خلال الفترة الجاية… واللي أكيد بعد ما يحصل مش هينقص من احترامي ليه أو احترامه ليا وهنفضل أصدقاء تجمعنا» أيام«اللي هتفضل أهم من أي حد وأي حدث، بس نبقي بنتجنب الضغوطات والمشاكل اللي ايا كان سببها موجود أو انتهى بلا رجعة”.
واختتمت زوجة المطرب الشهير رسالتها قائلة: “أتمنى الموضوع يتقفل ومشوفش أي حاجة تضايقني، واللي بيحبوني دعوة حلوة وشكرا لكل الحب والدعم اللي بشوفه”.
