نصائح د/شهيرة الغلبان لكل أم في كيفيه تعليم أبنتها معني الأنوثة و الأهتمام بنفسها.

لو عايزة بنتك تبقى ليدي يبقى من صغرها لازم تعلميها يعني ايه انثى وازاي تهتم بنفسها

أولًا :

البنت من صغرها لازم تشوف الام قدوة ليها ف الاهتمام بالنفس والاهتمام بالنظافة الشخصية

• يعني استحالة الام تكون مهملة سواء في نفسها او في بيتها ومش مرتبة وهاتربي بنت مهتمية بنفسها؛ دا بالعكس اهمال الام اكيد هاينعكس على اصول التربية الأساسية لبناتها واولادها

• الام هي الاساس والبنت بتلقط كل اللي انتي مش بتاخدي بالك منه

• لو رفعتي صوتك على زوجك او بتتكلمي عليه من وراه او بتتكلمي على اخواته بطريقة مش كويسه او على حماتك هاتلقط منك وهاتطلع شخصية مش سوية طبق الاصل منك

• لو رميتي هدومك على الارض هاتطلع مهملة زيك

• لو مابتغسليش اسنانك لو مابتتزينيش في البيت هاتطلع زيك

• الاطفال بتسجل كويس جدا في مخها وبتحفظ ادق أدق التفاصيل

• إذن لو عايزة بنتك تبقى مرتبة نضيفة انثى يبقى البداية منك انتي

ﺛﺎﻧﻴًﺎ مهم تعلمي بنتك من صغرها :

• غسيل الاسنان واجب مهم مرتين يوميا؛ في الاول انتي اللي هاتعملي المهمه دي ليها وبعدها لما تقدر هي تمسك فرشاة الاسنان هاتبدأ هي تغسل لنفسها اسنانها

• هاتيلها بادي سبلاش خفيف وعلميها ان دا معطر تحطه على هدومها (مش على جسمها) علشان ريحتها تكون حلوة

• زبدة كاكاو لونا اللي لونها احمر علشان تبدئي تدخلي ألوان في حياتها وتعرف يعني ايه تجميل وتزيين

• الشاور مرتين كل اسبوع

• تسريح الشعر يوميا ووفريلها سيرم مناسب مخصص ليها هي بتاعها لوحدها ترطب بيه شعرها

• تغير البانتي بتاعها يوميا وتنشف كويس بعد التويلت وتحطيلها علبة منايل كبيرة ف الحمام مخصوص للامر دا؛ التنشيف هايقيها بقدر الامكان من الالتهابات الفطرية

• أحيانا بنات قبل سن البلوغ بيظهرلها شعر واضح محرج جدا ف منطقة الشارب؛ وأمهات كتير بيسألوني نعمل ايه؛ الليزر مسموح لو الشارب فعلا واضح وبيسبب احراج للبنت ف المدرسة؛ ليزر ازالة شعر على درجة قليلة كل شهرين ثلاثة